Sunog sa Biyernes Santo, P5M ang danyos

CEBU, Philippines - Laing sunog ang miigo sa siyudad sa Sugbu sa miaging Semana Santa nga gibana-bana sa kabumberuhan sa dakbayan nga midanyos og P5 milyones.

Ang naugdaw atol sa Biyernes Santo mao ang bodega sa La Nueva Supermart diha sa dalan F. Gonzales ning siyudad nga sumala pa sa kabumberuhan nagsugod alas 5:52 sa buntag ug nilanat pa og 37 minutos una nakontrolar.

Napaubos sa second alarm ang maong sunog nga nilamoy usab (partially damage) sa kasikbit niini nga tindahan nga mao ang Hong Ken Trading. Dili pa matino sa kabumberuhan ang hinungdan sa nahisgutang sunog nga niugdaw sa nagkalain-laing mga stocks sa La Nueva.

Matud pa ni fire investigator SFO1 Nilo Daculan nga sila mopahigayon pa og ocular inspection ugmang adlawa aron pagtino sa hinungdan niini.

“Dili pa gyud ta kasulti kung unsa ang hinungdan sa sunog kay amo pa ning i-reinvestigate karong Monday, mo-conduct pa ta og ocular inspection,” sumala ni Daculan.

Kahinumduman nga niadtong Martes Santo, usa usab ka sunog ang niigo sa duha ka barangay sa dakbayan nga gibana-banang nidamyos og P12.5 milyones diha sa barangay Sta. Cruz ug San Antonio. 

Ang maong sunog miugdaw sa 28 ka mga panimalay sulod sa kapin sa usa ka oras ug naisa pa sa general alarm. (Elly Bolonos)   (BANAT NEWS)