Pundo sa paglimpyo sa Malapascua Solid Waste Management gipagawas na

CEBU, Philippines - Si Department of Tourism, Joseph “Ace” Durano mitunol sa pasiunang financial assistance nga P300 mil gikan sa P1.7 nga budget sa Malapascua Solid Waste Management project kagahapon.

Si Durano mitunol niini ngadto ni Logon barangay captain Rey Norabos sa Malapascua Island ug Rose Liza Osorio sa Coastal Conservation and Education Foundation kinsa maoy in-charge sa maong proyekto.

Gipaambit ni Durano ang plano sa DOT nga himuong world-class eco- tourism destination ang Malapascua nga naila na kaayo sa mga lokal ug langyaw’ng turista.

Matud pa ni Durano ang problema sa basura sa Boracay lisod kaayong sulbaron tungod kay sa pagsugod palang sa ilang proyekto didto duna nay kwatro mil ka mga lawak paabangan ug mosubra sa 20 mil na ang mga residente.

Ang Boracay bisitahon og dul-an 20 mil ka mga turista ang mobisita sa maong lugar matag tuig.

Apan gihulagway ni Durano nga nagmalampuson gihapon ang ilang proyekto sa Boracay tungod sa kinitaan sa mga resorts ug uban pa.

 “Sa akong na-obserbahan sa tanang beach destinations, kasagaran sa protection effort naa sa dagat ug ilawom sa dagat,” matud pang Durano.

Sa iyang bahin, si Kapitan Norabos nagkanayon nga dako kaayo iyang kalipay sa maong proyekto tungod kay malimpyuhan na gyud gikan sa mga nagpasad nga basura ang ilang lugar.

Apan giangkon hinuon ni Norabos nga nimenos gyud ang mga turistang mibisita sa Malapascua sa unang kwarter niining tuiga tungod sa ekonomikanhong krisis nga nasinati sa tibuok kalibutan. (Rey Pasaporte)   (BANAT NEWS)