BFP, BJMP alerto sab karon

CEBU, Philippines - Alerto usab karon ang mga sakop sa kabumberohan ingon man ang mga gwardiya sa bilanggoan sa dakbayan sa Sugbu subay usab sa pag-obserbar sa Semana Santa.

Matud ni Cebu City Fire Marshall Superintendent Ismael Codilla nga bisan kung wala silay nadawat nga kamanduan apan gipaalerto gihapon ang iyang mga sakop.

Tumong ni Codilla niini nga dunay daling makatubag sa bisan unsang alarma sa sunog nga posibleng motumaw taliwa sa naglagiting nga kainit karon sa panahon. Susama sa nahitabo niadtong milabay’ng Martes dihang miulbo ang dakong sunog diha sa dalan R.R. Landon daling nakaresponde ang kabumberohan.

Gipaabot nga mubakasyon ang ubang mga mulopyo sa siyudad ngadto sa nagkadaiyang probinsya ug adto mamalandong sa Semana Santa. Subay niini, mipahimangno ang City Fire Marshall ngadto sa mga bakasyonista nga siguruhon niining luwas sa sunog ang ilang mga panimalay.

“Just see to it nga ang inyong galamiton sa kuryente, i-unplug na, ang mga galamiton sa kusina ilabi na ang LPG (Liquefied Petroleum Gas) i-safety pud,” sumala ni Codilla.

Kadtong magpabilin dinhi sa dakbayan gitambagan usab sa Fire Marshall nga magmatngon ug magmabinantayon sa mga butang nga delikado sa sunog.

Sa iyang bahin miingon si Cebu City Jail Warden Superintendent Efren Nemenio nga niadto pang Lunes niya gipaubos sa red alert status ang bilanggoan.

Kini nagpasabot nga wala nay gitugutan sa iyang mga sakop nga mobakasyon ug gikanselar na usab ang mga day-off sa mga jailguards gumikan kay niini usab mga bulana maoy daghang mobisitang kabanay sa mga bilanggo.

Kini ilabi na usab nga sila modawat og mga dalaw atol sa Biyernes Santo tungod sa giandam nila sa labing unang higayon mopakita usab sa ilang kaugalingong bersyon sa Buhing Kalbaryo. (Elly Bolonos)       (BANAT NEWS)