CEBU, Philippines - Higpit nga gilusad sa Land Transportation Office (LTO) 7 ang Oplan Semana Santa alang sa pagsigurong luwas gikan sa mga aksidente ug nituman sa mga lagdang gipatuman ang mga sakyanan niining panahon sa Mahal nga Adlaw.
Kini ang nasayran sa Banat News kang Aden Belsa, deputy chief for operation sa LTO-7 nga nahinabi kagahapon.
Matud pa niya nga ang ilang 85 ka mga personnel sa operation department sa LTO-7 ang ipakatap sa habagatan ug amihanang bahin sa lalawigan aron higpit nga bantayan ang kadalanan.
Gipasabot niya nga ilang gilakip sa pagbantay ang South Bus Terminal ug North Bus Terminal alang sa pagsiguro nga walay overloading nga mahitabo sa mga sumasakay.
Si Capitol Consultant Byron Garcia nga nahinabi sa Banat News miingon nga naandan na ang hugot nga pagbantay sa South Bus Terminal sa panahon nga magdasok ang pasahero nga mamauli sa kalungsoran.
Dugang pa niya nga ilang gipaniguro nga hapsay ang pagsakay sa mga pasahero ug sigurado gyud nga makalingkod ug di na magkinahanglan og tawong bayran aron magpareserba og lingkuranan sama sa mga nahitabo kaniadto.
Nunot niini iyang giawhag ang mga pasahero sa pagbantay usab sa ilang mga butang ug dalang kabataan nga dili mataligam-an aron kalikayan ang mga kakulian sa ilang pagbiyahe.
Dunay gipakatap nga mga polis, blue guards ug mga K-9 dogs nga maoy mosimhot sa mga bagahe.
Si Belsa sa iyang bahin nagkanayon nga ang seguridad iya na sa kapolisan samtang ang ila mao ang kaluwasan sa mga pasaherong manakay ug sa mga sakyanan una pa makabiya sa mga terminal.
Lakip sa monitoron sa LTO-7 mao ang mga aksidenteng posibleng mahitabo, higpitan usab ang pagpaniid sa mga pasaheroang mag-over speeding ug overloading.
Ang LTO mikuha sa serbisyo sa mga deputized agents gikan sa nagkadaiyang lugar aron matabangan ang LTO personnel sa maong gimbuhaton.
Dugang pa niya nga aktibo usab nga maglihok ang Task Force Alpha alang sa pagbantay sa kadalanan sulod sa 24 oras nga hingpit nga matapos hangtod sa Pasko sa Pagkabanhaw. – BANAT NEWS