CEBU, Philippines - Gipanghimakak ni Talisay City Treasurer Emma Macuto ang pasangil ni kanhi Cebu Customs District Collector David Odilao nga gituyo niya paglangay ang paghatag sa premyo sa mga midaog sa gipahigayong lumba sa sakayan.
Gibutyag ni Macuto sa mga tigbalita kagahapon nga dili niya tinuyo ang paglangay kundili mugna ang tanan sa legal nga panukdanan ug proseso sa pagpagawas sa kuwarta sa gobyerno gikan sa panudlanan niini subay sa mga lagda ug pamaagi nga gilatid sa Commission on Audit (COA).
.Sa sayo pa si Odilao kinsa maoy tsirman sa City Fishery Acquatic Resources Management Council (CFARMC) puwerting lagota kay siya’y gipaninglan sa mga mananaog sa Baroto Regata sa ilang premyo busa iya lang kining gipabali og kuwarta.
Si Odilao kinsa nagpangusmo sa kapungot walay laing gibasol gawas kang Macuto kay matud pa niya nagpakahilom lang kini ug wala gyud siya pahibaw-a nga anaa na sa panudlanan sa tresurera sa Talisay ang P150 mil nga hinatag sa Kapitolyo alang sa premyo sa mga mananaog sa lumba sa mga baroto.
Giangkon ni Macuto nga niadtong Disyembre 24, 2008 pa nadawat nila ang maong salapi apan tungod sa kadaghan nila og giatiman, wala sila makapahibawo kang Odilao.
Matud pa ni Macuto nga kun gi-follow-up pa ni Odilao ang maong kuwarta, iya unta kining makuha,
Si Macuto midugang nga ang napulo ka mga midaog sa Baroto Regatta nga kasagaran taga Cordova napremyohan na nila tungod kay kompleto ang mga papeles niini. - Brenda D. Batuto (BANAT NEWS)