Premyo sa Baroto Regatta wa tagoi-Bacaltos

CEBU, Philippines – Gidapigan kagahapong adlawa sa city administrator ang city treasurer mahitungod sa pasangil nga gitagoan niini ang P150 mil nga funds alang   unta sa premyo sa kompetisyon sa “Baroto Regatta” sa dakbayan sa Talisay.

Si Talisay City Administrator Richel Bacaltos nagkanayon nga ang organizer sa maong kompetisyon maoy wala mosunod sa pamaagi sa gobiyerno may labot sa kwarta sa gobiyerno.

Matud pa niini kinahanglang mag-agi kini og mga legal nga proseso una pa ipagawas.

“They should have asked why to the concerned persons rather than commenting without knowing what really happens,” pasabot pa ni Bacaltos.

Si kanhi customs district collector David Odilao nga maoy nagpasiugda sa maong kompetisyon gikatahong wala makabayad sa mga miapil sa maong kompetisyon.

Matud pa ni Odilao nga ang P150 mil nga para sa kompetisyon gi-donate ni Governor Gwendolyn Garcia niadtong miaging tuig alang   unta sa Baroto Regatta nga himuon niadtong Oktobre apan ang pundo migawas niana pang Disyembre 24 sa miaging tuig.

Si Odilao nagkanayon nga duha ka adlaw sa wala pa ang kompetisyon mao palay ilang pagkasayod nga ang maong salapi atoa sa posesyon sa city treasurer nga si Emma Macuto,

Pasabot pa ni Odilao nga kung gipahibalo lang sila nga anaa ra diay nila ang maong kwarta napasalig unta nila dayon sa mga entranteng nakadaog nga ang premyo naa sa city treasurer.

Sa lima nga nakadaog sa maong kompetisyon usa lang ang nakakuha og premyo, kini mao ang entrante gikan sa Cordova nga nakadala og P20 mil.

Si Odilao nagkanayon nga nagkinahanglan pa sila og P90 mil para lang sa premyo wala pay labot sa ubang nagamit nga gasto sa pagpahigayon na sa kompetisyon.

Sa iyang bahin, si Talisay City Treasurer Emma Macuto mihimakak nga ilang gitagoan ang maong kwarta tungod kay dili ilahang sayop kung nadugay man kini paghatag.

Dugang pa niya nga ang maong kwarta anaa lang sa city trust fund ug mahimong gamiton sa laing proyekto sa syudad dili lang sa kompetisyon nga maoy gihatagan sa maong kwarta. (Lesley Caminade gikan sa The Freeman) (BANAT NEWS)