Ihawan sa Talisay gimintenar pag-ayo

CEBU, Philippines - Ang kagamhanan sa dakbayan sa Talisay naninguha nga magpabiling   double “A” standard ang ihawan niini pinaagi sa pag-atiman pirme sa tanan niining kahimanan aron mahinagbo kanunay ang gipangayo sa National Meat Inspection Service (NMIS).

Si Talisay City Veterinarian Dr. Galileo Larawan mibutyag sa Banat News nga nag-amping na kanunay ang nagdumala sa ihawan pinaagi sa pag-yo dayon o kaha pag-ilis kutob sa madaot nga mga piyesa sa mga makinarya aron nga mamintinar kanunay ang dagan o operasyon sa maong ihawan matag adlaw.

Gibutyag ni Larawan nga usa sa gipangayo sa NMIS mao ang paglain sa lawak sa “guttery section” o ang lugar nga habwaanan sa mga sulod sa ginhawaan sa mga dagkong hayop sama sa kabaw ug baka.

 Ang sawranan sa dugo ipalain usab og kuwarto aron masiguro nga limpiyo gyud ang mga karne nga giihaw sa ihawan sa Talisay.

Ang double “A” nga ihawan, makabaligya na sa iyang mga karne sa nagkalainlaing lugar sa nasud, lahi sa single “A” nga ihawan kansang karne anha ra ikabaligya sa lugar nga gitarok ang maong ihawan, ug ang triple “A” nga ihawan makabaligya na ngadto sa gawas sa nasud sa iyang mga karne. – BANAT NEWS