Manok sa oposisyon vs. BOPK suportado ni Gwen

CEBU, Philippines - Mibahad si Governor Gwendolyn Garcia nga iyahang paluyuhan ang si bisan kinsang kandidatong moatbang sa kandidato ni Mayor Tomas Osmeña sa pagkamayor sa siyudad sa Sugbo sa umaabot nga election sa tuig 2010.

Usa sa mga ibato unyang isyu sa gobernador mao ang kontrobersiyal nga Provincial Ordinance 93-1 kansang mga molupyo matud pa niya gihatagan og sayop nga kasayuran sa mayor aron madaut ang imahe sa kagamhanan sa probinsiya.

Kini tungod kay ang kwentada sa pagbayad sa lote sa 93-1 nga gihulagway sa mayor nga sobra kadako, usa ka dakong bakak tungod kay daghang mga okupante ang nakadawat na sa ilang deed of absolute sales.

Kini pagmatuod nga ilaha na ang lunang ilang gipuy-an, di palang dugay si Osmeña mipadayag og kasagmuyo nga gilisod-lisod sa lalawigan ang mga residente sa 93-1 ug gitigi-tigi usab ang paghatag sa mga titulo.

Sa Memorandum Of Understanding tali sa Kapitolyo ug mga barangay kapitan nga nalakip sa 93-1 mipasalig kining walay mapapahawang mga lot occupants hangtod nga mahingpit pagbayad sa lote niini.

Matud pa sa gobernadora nga ang papakita'g kaluoy sa mayor ngadto sa mga okupante usa lamang ka pagpakaaron-ingnon tungod kay ang tinuoray may politikanhon kining katuyoan.

Sa pagkakaron wala pay solidong kandidato pagkamayor ang oposisyon partikular ang Kusog nga partido sa karibal sa politika ni Osmeña nga si kanhi Mayor Alvin Garcia.

Samtang ang BOPK duna nay kandidatong sila si Bise Mayor Michael Rama ug Agustus Joy Young sa 2010. – BANAT NEWS