CEBU, Philippines - Usa ka ginang ang namatay ug laing unom ang nangaangol dihang mibangga ang ilang gisakyang pasaheroang multicab sa usa ka poste diha sa highway sa barangay Tunghaan lungsod sa Minglanilla kagahapon sa alas 5:25 sa buntag.
Ang namatay paghiabot sa Minglanilla District Hospital mao si Victoriana Villarmia, molupyo sa Tuyan siyudad sa Naga.
Samtang ang mga naangol mao sila si Basilica Algono, 57, taga Tuyan, Naga; Julius Obeso, taga Linao siyudad sa Talisay; Luzviminda Sanchez, 57, taga Saint Joseph sa barangay Tunghaan, Minglanilla; Alejandra Larriosa, 56, taga Panadtaran, San Fernando ug Domingo Cantillas, 30, taga Langtad siyudad sa Naga.
Ang maong multicab pasahero-an nga may rotang San Fernando pangadto sa Tabunok gimaneho ni William Obeso, 29, molupyo sa siyudad sa Talisay.
Matud ni PO1 Humphrey Alpas sa Minglanilla police dihang nahinabi sa Banat News namasahero ang maong multicab paingon sa Tabunok gikan sa San Fernando.
Apan pag-abot sa maong lugar nawad-an og preno ang multicab hinungdan nga iyang gilihayan ang gisundang dump truck nga hapit na niyang madumbulan sa luyo apan naatol nga dunay motorsiklo nga iyang gikasugat hinungdan nga nilihay na usab unta kini apan didto na mosampak sa sementadong poste sa kuryente.
Maayong pagkapiyapi ug gitabang sa mga tawo ang mga pasahero niini pagdala sa tambalanan apan gideklarar nga dead on arrival si Villarmia nga diha maglingkod sa front seat.
Ang drayber nga boluntaryong mitahan sa iyang kaugalingon ug nabalhog na sa detention cell samtang giandam ang kasong ipasaka batok kaniya. – BANAT NEWS