Enrollment nagpadayon

CEBU, Philippines - Gipahibawo sa Cebu City Schools Division nga nagpadayon na ang enrollment alang sa sunod tuig-tingtungha bisan pa man wala pa mahuman ang graduation exercises sa tanang pampublikong tunghaan sa dakbayan.

Matud pa ni City Schools Division Superintendent Lorna Rances nga mahimo nang mopalista og sayo sa ilang mga anak ang mga ginikanan alang sa subling pagbukas sa klase karong bulan sa Hunyo.

Si Rances nagkanayon nga niadto pang buwan sa Enero nagsugod ang enrollment sa mga tinun-an nga mo-grade 1 ingon man niadtong mag-first year high school.

Gusto sa City Schools Division Superintendent nga ma-enroll og sayo ang mga tinun-an aron dili na maghuot pag-abot sa adlaw sa tingklase.

Gitambagan ni Rances ang mga ginikanan nga moduol lang sa buhatan sa principal sa tunghaan aron adto magpalista sa ilang mga anak.

Gitataw sa City Schools Division Superintendent nga sama sa gihapon, walay kontribusyon nga kolektahon ang tunghaan gikan sa mga ginikanan atol sa enrollment. – BANAT NEWS