Presyo sa isda, utanon mosaka

CEBU, Philippines - Gipaabot nga mosaka ang presyo sa pipila ka mga palaliton dinhi sa Sugbu sugod ugmang adlawa nunot usab sa pag-obserbar sa Semana Santa.

Partikular na niini ang mga lagutmon, utanon ug isda, nga maoy sagad paliton ug pangan-on sa Kristohanong katilingban ning panahon sa tingpuasa.

Ang chairman sa Cebu Market Vendors Development Cooperative (Cemvedco) nga si Erwin Goc-ong nakaobserbar niini sa nangaging Semana Santa.

Matud pa ni Goc-ong nga pag-abot sa Lunes Santo mosugod na og saka ang presyo sa mga lagutmon, utanon ug isda diha sa Carbon Public Market.

Kini gihulagway hinuon ni Goc-ong nga normal lang nga mahitabo sa bisan unsang higayon kung dunay taas nga panginahanglan.

“Mao man gyud na ang sagad mahitabo kung mosaka ang demand, mugamay sab ang supply, mumahal gyud na ang presyo,” sumala ni Goc-ong.

Gitataw hinuon ni Goc-ong nga mobalik ra ang naandang presyo sa nahisgutang mga baligya pag-abot sa Easter Sunday o Pasko sa Pagkabanhaw.

Sa susamang kalamboan, gipaabot usab nga momenos ang halin sa baligyang mga karne diha sa kamerkaduhan sugod ugmang adlawa.

Apan giklaro ni Goc-ong nga bisan kun momenus ang mamalit og karne ilabi na sa baboy atol sa Semana Santa kuli nga moubos ang presyo niini.

“Dili man ta daling makapaus-os sa presyo kay taas man daan atong pagpalit sa baboy, ang ato lang himuon nga minusan atong supply,” matud ni Goc-ong.

Nasayran nga ang mga negosyante didto sa kauluhan ug sa ubang dapit sa nasud, nisugod na pagpasaka sa presyo sa ilang baligya nga mga utanon, lagutmon ug isda apan mibarato ang mga karne. - Elly Bolonos (BANAT NEWS)