Dinakpan sa PDEA wala ipa-drug test

CEBU, Philippines - Wala nakapahigayon og drug testing ang Philippine Drug Enforcement Agency (PDEA) sa katorse ka dinakpan lakip na ang unom ka nursing student sa miaging adlaw sa buy bust operation diha sa barangay Pasil.

Kini gumikan ra usab sa mga ginikanan sa unom ka estudyante nga nagdumili sa maong drug testing sa ilang mga anak.

Sa text message sa tigpamaba sa PDEA-7 nga si Jessie Tabanao sa Banat News nagkanayon nga wala nila gipadayon ang pagpa-drug test sa mga estudyante ug kaubanan tungod kay di nila mahimong mapugos ang mga dinakpan tungod kay supak na usab kini sa balaod.

Si Tabanao nagkanayon kini nga wala siya masayod og unsay hinungdan ug kun nganong wala mosugot ang ilang mga ginikanan nga ipaubos ang ilang mga anak sa drug test.

Si Dangerous Drugs Board undersecretary Atty. Paul Clarence Oaminal sa pakighinabi sa Banat News sa telepono mibutyag nga nawagtang ang kahigayonan sa mga tinun-an nga makalingkawas sa tinong pagkabilanggo kun mapamatud-an ang kasong isang-at kanila nga visiting drug den.

Dugang pa niya di gyud hinuon makapugos ang PDEA pagpa-drug test kanila bisan may kalambigitan sa illegal drugs ang ilang kaso.

Ang mga tawong mapamatud-ang migamit og illegal nga drugas pinaagi sa drug testing matud pang Oaminal mamahimong mosang-at og petisyon sa korte diin nasang-at ang initial nga kasong ilang giatubang.

Ang resulta sa drug testing magamit na nga kamatuuran kon ebidensya nga mga biktima ang ilang anak sa illegal drugs ug kinahanglang luwason pinaagi sa voluntary rehabilitation, ning paagiha dako ang tsansang di mapriso sa bilanggoan ang ilang mga anak.

“Mas pabor unta ni sa ilaha (suspek) kung ma-prove nga migamit sila og illegal drugs pwede silang mopetisyon for rehabilitation,” sumala pang Oaminal.

Matud pa ni Tabanao nga ang ilang ipasakang kaso sa unom ka tinun-an ug laing unom ka mga suspek karung umaabot Martes, Abril 7, mao lang ang kasong visiting drug den.

Kini ang kalapasan sa Section 7 Article II sa RA 9165 kon Employees and Visitors of a Den, Dive or Resort nga kun mapamatud-ang sad-an dunay silot nga pagkabilanggong 12 ka tuig ngadto sa 20 ka tuig ug multang P100,000.

Samtang ang duha ka gitumbok sa PDEA nga drug pushers nga sila si Junrey Chavez ug Arthur Ybañez pasakaan usab og kasong kalapasan sa Section 5 Article II sa RA 9165.

Gumikan sa maong kalambigitan sa mga tinun-an sa kolehiyo sa illegal drugs, si Oaminal miawhag karon sa Commission on Higher Education nga himuon usab ang random drug test sa mga enrollees sa ingon nga mahibaw-an kinsay angayang tabangan pinaagi sa rehabilitasyon sa ilang mga bag-ong estudyante.  - Uban sa report ni Edwin Ian Melecio (BANAT NEWS)