City Hall andam sa congressional probe

CEBU, Philippines - Andam na ang mga opisyal sa dakbayan sa Sugbo pagpanalipod sa Filinvest deal nga gikwestyon karon sa mga opisyal sa probinsya.

Matud ni acting Mayor Michael Rama nga andam silang mutubag sa mga pangutana ug mopasabot sa kongreso kun mahinayon ang giplanong congressional inquiry.

Si Kongresista Pablo John Garcia maoy nangusog nga mapahigayon ang inquiry sa nahisgutang transaksyon tungod sa iyang pagduda nga kini dunay anomaliya.

Apan matud ni Rama nga gipaubos sa makuting pag-review ug pagtuki ang napirmahang kasabutan tali sa kagamhanan sa dakbayan ug sa Filinvest.

Kini ang hinungdan nga sila wala mabalaka ug mahadlok nga gamiton ang kongreso sa pag-utingkay sa nahisgutang transaksyon nga gisudlan sa dakbayan.

“We are ready if we are being asked to appear before Congress to once and for all answers if that will settle things out,” sumala ni Rama.

Sa iyang bahin, gipadayag ni city administrator Francisco Fernandez nga wala sila matandog sa mga punto nga giisa sa mga Garcia.

Ang city administrator nga maoy nangulo sa Joint Venture Selection Committee nga mituon sa kasabutan miingon nga sayon ra’g depensahan ang Filinvest deal.

“We can defend it in Plaza Miranda and anywhere else kay favorable kaayo sa City ang maong agreement,” nagkanayon si Fernandez.

Gani, gihangop sa city administrator ang planong congressional inquiry aron ilang hingpit nga mapasabot sa katawhan ang kinatibuk-ang kasabutan.

Tipik sa napirmahang kasabutan mao ang pagpalit sa Filinvest og napulo ka ektaryang luna diha sa South Road Properties (SRP).

Gawas niini mogamit usab ang Filinvest sa laing 40 ka ektarya diha sa SRP pinaagi sa pagpakig-joint venture sa kagamhanan sa dakbayan.

Nasayran nga niadtong miaging gabii, gitigom ni Gobernadora Gwendolyn Garcia ang mga kongresista sa Sugbo. – BANAT NEWS