Concert producer wa mobayad og buhis
CEBU, Philippines - Naningil na ang kagamhanan sa dakbayan sa Sugbu sa duha ka concert producer nga napakyas pagbayad sa dul-an sa tunga sa milyon ka pesos nga amusement tax.
Ang utangan sa siyudad mao ang Manila Genesis Production (MGP) ni Angeli Valenciano nga asawa ni singer-actor Gary Valenciano, ug MJM Productions ni Edgardo Mangahas.
Nakautang ang MGP dihang mipahigayon og concert ni Gary V. dinhi sa siyudad niadtong Pebrero 14 sa miaging tuig nga giulohan og “His Love Concert”.
Mokabat sa P217, 554. 75 ang gipaningil sa City government nga amusement tax ngadto sa MGP lakip na sa interest ug surcharge niini.
Samtang ang MJM Productions napakyas usab sa pagbayad sa buhis niini ngadto sa syudad nga balig P229,281.00 dihang mipahigayon kinig konserto sa miaging Pebrero nga giulohan og “Pop Icon Live In Cebu” nilang Pops Fernandez ug kaubanan.
Nasayran nga ang nahisgutang producer wala pa usab makaimpas og bayad sa amusement tax sa concert nga gipasiugdahan niini sa miaging tuig.
Kini mao ang Air Supply From The Heart event nga giingon ni Mangahas nga gamay ra ang ticket sales nga niresulta sa ilang kaalkanse.
Mapangahason hinoong nipasalig si Mangahas nga dili motalikod sa ilang obligasyon apan kini nangayo og konsiderasyon sa siyudad.
Gusto ni Mangahas nga maminusan ang ilang bayranan sa amusement tax aron kini ilang maatiman sa labing dali nga panahon. - Elly Bolonos (BANAT NEWS)
- Latest
- Trending
