CEBU, Philippines - Ipadayon ugmang adlawa ang nasugdan nang pagpangrehistro sa Comelec sa siyudad sa Sugbu ngadto sa kabarangayan sa dakbayan.
Niining higayuna, ang barangay Adlaon mao na usab ang duawon sa Cebu City Comelec alang sa paghatag og kahigayonan sa mga mulopyo nga marehistro.
Gitataw hinoon ni City North District Election Officer Attorney Marchel Sarno nga lakip sa makaparehistro mao ang kasikbit nga mga bukirang barangay sa Adlaon.
Kadtong magparehistro magdala lang og balidong identification (ID) o dili ba hinoon marriage contract, driver’s license ug uban pang dokumento.
Nidugang si Sarno nga kadtong mga batan-on nga mag-18 anyos unya sa Mayo sunod tuig atol sa eleksyon mahimo usab nga magparehistro na.
Nagkanayon ang election officer nga gikinahanglan lang nga ang bag-ong mga registrants magdalag ID ug birth certificate.
Gipadayag ni Sarno nga ang satellite registration magpadayon matag Sabado kung adunay request nga ilang madawat gikan sa kabarangayan.
Kini aron sa paghatag og kahigayunan sa mga molupyo nga makaparehistro ilabi na niadtong walay panahon pagduaw sa buhatan sa Comelec.
Unang gipahigayon ang off-site registration diha sa barangay Banilad (UC) ug barangay Tejero sa amihanang distrito sa dakbayan.
Nasayran hinoon nga wala pay plano ang Comelec South District nga mopahigayon og kaugalingong satellite registration sa kabarangayan sa habagatang distrito. – BANAT NEWS