CEBU, Philippines - Anak ni Mayor Socrates Fernandez nga si Joavan Fernandez mi-plead not guilty sa gipahigayong arraignment niadtong Martes sa buntag diha sa Municipal Trial Court in Cities (MTCC) sa dakbayan sa Talisay sa kasong kalapasan sa Akta Republika 8294 nga gipasaka batok kaniya sa mga ahente sa National Bureau of Investigation (NBI).
Si Joavan kinsa nadetiner na karon sa Talisay City Jail tungod sa kasong illegal detention nga gipasaka batok kaniya sa pamilyang Abellana mitungha diha sa sala ni Judge Mario Manayon alang sa maong arraignment.
Si Joavan ang gitugotan nga makabayad og P40 mil nga piyansa alang sa iyang temporaryong kagawasan sa kasong kalapasan sa RA 8294 apan tungod kay seryosong krimen man ang illegal detention wala kini tuguting makagawas.
Karong Mayo 7, 2009 sa alas 8:30 sa buntag ipahigayon ang pre-trial sa maong kaso.
Kahinumduman nga gidakop sa mga ahente sa NBI pinanguluhan ni Arnel Pura pinasikad sa warrant of arrest nga giluwatan ni Regional Trial Court Judge Manuel Patalinghug sa Branch 22 niadtong Oktobre 6, 2008.
Ang NBI gikatahong nakakuha og usa ka walay sulod nga magazine sa .9mm caliber KG-9 submachine pistol ug laing magazine sa kalibre .45 nga may walo ka buhing bala ingon man mga shabu paraphernalia.
Nasuta usab nga positibo kining migamit og ginadiling drugas human ipailawom sa drug screening ang iyang ihi, butang nga gihimakak ni Joavan human sa iyang pagkasikop sulod sa usa ka massage parlor sa barangay Tabunok.
Si Manayon ang mihatag og konsiderasyon sa information ug affidavit sa witness sa prosekusyon hinungdan nga miluwat kini sa Commitment Order ni Joavan niadtong Pebrero 27, 2009. – BANAT NEWS