13-anyos miinom kemikal namatay

CEBU, Philippines - Patay nang nahidangat sa tambalanan ang usa ka 13-anyos nga   lalaki human kini gituohang naghikog pinaagi sa pag-inom og makahilo nga kemikal atubangan sa iyang mga barkada didto sa dalan F. Ralota, Poblacion, siyudad sa Danao niadtong Martes sa ala 1:00 sa kaadlawon.

Ang namatay nga batan-on mao si Jeefrey Zamora Fernandez, 13, wala na magtungha ug molupyo sa Sto. Tomas Village, Tuburan Sur, sakop sa nahisgutang siyudad.

Matud ni SPO4 Edgar Gomez sa Danao City Police Station sa dihang nahinabi sa Banat News subay sa pamahayag sa mga barkada niini nga batan-on nga nagkalingaw pa ang biktima og estorya-estorya nila sa pine tree sa maong lugar atubangan sa naglinya nga mga tindahan nga nagbitbit og baso nga dunay sulod nga tubig.

Samtang nakig-estorya-estorya ang biktima sa iyang mga barkada nagsige usab kini og tungab sa tubig diha sa iyang baso hangtod sa pagkahurot niini ug paglabay sa pipila ka gutlo, namatikdan sa mga barkada niini nga hinayhinay nga mibati og pagsakit sa tiyan ug pagkaluya ang biktima dayun nang pagkalup-og sa yuta.

Dali dayon nila kining gitabang ug gidala sa Danao City District Hospital apan gideklarar sa mga doktor nga dead on arrival ug gituohan nga ang giinom niini nga gituohang dunay sagol nga kemikal nga nakahilo niini. – BANAT NEWS