Mag-uuma gipusil, gitigbas, giluba

CEBU, Philippines – Wala na makamata pa ang usa ka hubog nga mag-uuma nga nakatulog sa yuta gawas sa barangay hall sa dihang gipusil, gitigbas ug gidunggab sa duha ka mga suspetsado hangtod nga namatay atol sa gipahigayong disco didto sa bukirang bahin sa barangay Bulak, lungsod sa Dalaguete niadtong Domingo sa ala 1 sa kaadlawon.

Ang biktima nga gikan sa pagkatulog mideretso og kamatay mao si Panfilo Bantilan Cariman, 44, minyo, usa ka mag-uuma ug molupyo sa nahisgutang lugar.

Samtang ang duha ka mga suspek mao sila si Efren Limbaga ug Marcing Cuestas Debalucos, pulos hingkod ang panuigon ug mga molupyo sa nahisgutang lugar.

Matud ni SPO2 Francisco Leornas sa Dalaguete Police Station sa dihang nahinabi sa Banat News subay sa blotter nga gibasehan niini ang biktima nakatulog kini sa yuta sa gawas nga bahin sa barangay hall tungod sa kahubog dili layo sa diskohan sa dihang giduol sa suspek nga si Efren dayon gidul-itan sa pagpusil sulod sa tulo ka higayon sa wala pa matino nga kalibre sa armas.

Pagkataud-taod sunod nga miduol ang laing suspek nga nagdala og sundang dayong tigbas sa biktima nga nagbuy-od na niadtong higayuna ug wala makamata ug pagkahuman gitabangan sa duha ka suspek ug dunggab dunggab ang kalawasan niini una pa gibiyaan sa dihang natino nga patay na.

Sa pagresponde sa mga polis patay na ang biktima nga nagbuy-od sa yuta nga naputos sa samad tinigbasan ingon man dinunggaban ang kalawasan niini ug duna pay pipila ka samad pinusilan.

Dugang nahipos nga inpormasyon sa kapolisan gikan sa mga molupyo sa maong lugar gituohan nga gipanimawsan ang biktima sa mga tawo nga nagdumot niini gumikan kay gihulagway kini nga “isog-isog” sa maong lugar ug kanunay mangita og away.

Ang kapolisan padayon pang nihimo og imbistigasyun aron pagsikop sa mga suspek nga gituohan nga nakasibat na pahilayo sa maong lugar. –BANAT NEWS