Hitman sa Bloods mitipi sa 14-anyos
CEBU, Philippines – Gituohang hitman sa Bloods gang mipatay sa usa ka minor de edad kagahapon sa alas dos sa buntag sa eskina Ramos ug D. Jakosalem, barangay Cogon Ramos.
Si Jonas Ritualla gikatahong hitman sa grupong Bloods gang gitumbok nga mipusil patay sa 14 anyos nga batan-on nga lumulopyo sa sitio Bayabas barangay Zapatera.
Base sa pasiunang imbestigasyon sa kapolisan nga ang 14 anyos nga batan-on nagbaklay paingon pauli sa ilang balay kauban sa iyang mga higala nga gikan naglaag.
Sa dihang naabot sila sa maong lugar ilang naagian si Ritualla kauban ang mga higala usab niini nga naglingkod sa atbang sa ilang giagian. Apan sa kalit lang gigukod sila ni Ritualla ug mga kauban.
Ang 14-anyos ug mga kauban mikaratil usab og dagan tungod kay gipanggukod man sila sa grupo ni Ritualla.
Apan wala lang damha kalit lang nga mipabuto si Ritualla ug naigo ang 14-anyos. Samtang ang grupo ni Ritualla dali usab nga nakadagan paingon sa eskina D. Jakosalem ug RR Landon.
Ang 14-anyos gisuway pagdala sa Vicente Sotto Memorial Medical Center, apan gideklarar kini nga dead on arrival.
Ang kapolisan nagpahigayon unta og hot pursuit operation apan wala na nila maabti si Ritualla.
Matud pa ni PO2 Leroy Villamor Baguio sa pakighinabi sa Banat News ang biktima nakaangkon og samad pinusilan sa walang ilok ug milapos sa kasingkasing base usab sa resulta sa autopsiya. –BANAT NEWS
- Latest
- Trending
