Mga Senior sa 4th district nakadawat og tag P500
CEBU, Philippines - Dul-an sa dos mil ka mga ‘senior citizens’(SC) sa ika-upat nga distrito sa lalawigan sa Sugbo ang nakadawat og tag P500.
Si Kongresista Benhur Salimbangon ang nangunay sa pagtunol sa tag P500 matag usa ka SC atol sa iyang pagbisita sa kalungsoran sa distrito.
Sa lungsod sa Medellin adunay 499, sa Tabuelan adunay 372, samtang 968 sa lungsod sa Daanbantayan.
Ang nakapahimulos sa maong pahalipay mao lang kadtong mga SC nga nag-edad og 70 pataas nga narehistro sa Department of Social Welfare and Development (DSWD) matag lungsod.
Matud pa ni Salimbangon nga ang maong pundo gikan sa Katas ng VAT Program ni Presidente Gloria Macapagal Arroyo isip pahalipay sa katigulangan nga nag-edad na og 70 anyos pataas.
Daku ang kalipay nga gibati sa mga SC sanglit nahinumdoman pa gyud sila sa gobyerno bisan pa sa ilang pangedaron.
Midugang si Salimbangon nga sa dili madugay isunod usab sa pagpang-apod-apod ang susamang pahalipay ngadto sa ubang lungsod nga sakop sa distrito. (Gregg M. Rubio) (BANAT NEWS)
- Latest
- Trending
