CEBU, Philippines - Gibana-banang 500 ka mga pari ilawom sa Archdiocese of Cebu ang subling manumpa sa ilang panaad pagkapari karong adlawa diha sa Cebu Metropolitan Cathedral.
Ang maong kalihukan himuon matag tuig sa Simbahang Romano Katoliko atol sa pagsaulog sa Chrism Mass nga maoy kasagarang adlaw nga daghang kaparian ang motambong ug sagad himuon kun magkaduol na o panahon Huwebes Santo sa Semana Santa.
Sumala pa ni Fr. Mhar Balili, ang parochial vicar sa Cebu Metropolitan Cathedral ang Chrism Mass maoy adlaw nga handumon sa kaparian ang ilang panaad ngadto sa Ginoo.
“This is a very special occasion that will remind us, priests, that our commitment to the Lord should be constant despite our weaknesses and limitations. It also meant to energize us as we continue with our pastoral functions and ministry,” matud pang Fr. Balili.
Giimbitar usab sa maong okasyon ang tawo tungod kay kini maoy higayon nga mapakita sa mga parokyano ang ilang suporta sa kaparian ug labaw sa tanan makita nga ang Simbahan wala palihuka sa usa ra ka tawo, matud pang Balili.
Matud pa niya bisan paman sa kadaghan sa mga eskandalong gikalambigitan sa ubang kaparian daghan pa gihapong mga pari ang sensiro sa ilang bokasyon isip alagad sa Ginoo.
Ang maong kalihukan panguluhan unya ni Cebu Archbishop Ricardo Cardinal Vidal uban sa duha ka auxiliary bishops.
Karong adlawa usab ang pagbendisyon sa mga lana nga gamiton sa kaparian sa bunyag, kompirma ug paghilog sa mga masakiton.
Ang Chrism Mass karong alas-9 sa buntag awitan sa nabantog nang University of the Visayas Chorale nga duyugan usab sa bag-uhay lang naayong pipe organ nga patukaron ni Msgr. Rudy Villanueva nga usa usab ka musikero. (Edwin Ian Melecio) (BANAT NEWS)