Buhing Kalbaryo gipangandaman na

CEBU, Philippines - Padayon karong nagbansay-bansay ang mga entrante sa lain na usab nga pagpahigayon sa “Buhing Kalbaryo” karong Biyernes Santo sa sunod semana.

Kini maoy gipahibawo ni acting mayor Michael Rama nga maoy mimugna sa maong konsepto kapin sa napulo ka tuig na ang nakalabay.

Ang Buhing Kalbaryo maoy usa ka presentasyon nga maghatag og buhing paghulagway sa pasyon ug kamatayon ni Hesus ibabaw sa Krus.

Apan sukwahi sa nangaging pagpahigayon sa Buhing Kalbaryo, gusto ni Rama nga walay ilansang sa krus karong Biyernes Santo.

Mitagam na ang acting mayor dihang nahimo nga kontrobersyal ang pagpahigayon sa Buhing Kalbaryo niadtong miaging tuig.

Kini dihang nakalimtan pag-inject og anesthesia ang mga kamot ni Jose Marvi Escuyos nga maoy nagdala sa papel ni Hesus atol sa crucifixion.

Labihang nakasiyagit si Escuyos sa matag dokdok sa lansang diha sa iyang mga kamot tungod sa tumang kasakit nga nakapangilob-kilob usab sa mga tawo nga nanan-aw.

Natapos tuod ang presentasyon apan gitabang si Escuyos human sa relihiyusong kalihukan nga nakapadismaya sa director niini nga si Al Ebangelio.

Gani nibahad si Ebangelio niadtong tungora nga dili na modirihir og balik sa Buhing Kalbaryo tungod sa nahimong kapalpakan sa mga organizer niini.

Apan nasayran gikan kang Rama nga si Ebangelio kabahin gihapon karon sa Buhing Kalbaryo nga mao nay ika-doce ka tuig nga pagpahigayon niini.

Nasayran usab nga si Escuyos kinsa nisaad sa miaging tuig nga dili na magpalansang pag-usab, apan giingong nipadayag na karon sa iyang kaandam.

Giklaro hinoon ni Rama nga siya mosugot lang nga dunay malansang, kung dunay kasigurohan nga dili masubli ang nahitabo kang Escuyos sa miaging tuig. - BANAT NEWS