Vintage bomb gipatimbang

CEBU, Philippines - Daling gi-turn over ngadto sa kapolisan sa usa ka nanag-iya og junkshop ang usa ka vintage bomb nga gituohang gigamit pa atol sa ikaduhang gubat sa kalibutan sa dihang gibaligya kini sa maong shop sa wala magpailang lalaki didto sa barangay Panadtaran, lungsod sa San Fernando niadtong Sabado sa alas 6 sa buntag.

Ang tag-iya sa maong junkshop nga si Calixto Canoy, 41, minyo ug molupyo sa nahisgutang lugar dali dayon kining mitawag sa buhatan sa kapolisan human makalakaw ang lalaki nga nagbaligya niya sa maong vintage bomb tungod sa iyang kahadlok nga basin kini kun mobuto.

Matud ni PO3 Marjurkin Misuari sa San Fernando Police Station sa dihang nahinabi sa Banat News subay sa blotter nga gibasehan   daling miresponde ang ilang mga kaubanan sa maong lugar ug gikuha ang maong vintage bomb ug kasamtangang gikustodiya sa buhatan sa kapolisan.

Gituohan sa kapolisan nga posible pang mobuto ang maong vintage bomb nga nakit-an bisan og gitay-an na kini tungod kay kompleto pa ang porma niini.

Ang kapolisan sa San Fernando nagpaabot na lang sa mga sakop sa bomb disposal unit sa Cebu Police Provincial Office aron ma-dispose ang maong bomba. - BANAT NEWS