Aksidente sa Naga leksyon sa mga drayber - Chiong

CEBU, Philippines - Gipanghinaut sa mayor sa dakbayan sa Naga nga si Valdemar Chiong nga mahimong leksiyon sa mga drayber nga kusog kaayong magpahaguros sa ilang mga gimanehong sakyanan ang nahitabong aksidente niadtong Sabado sa buntag diha sa barangay Tuyan nga mikalas og 14 ka tawo.

 Giawhag sa mayor ang mga drayber nga ibutang kanunay sa ilang alimpatakan ang safety sa ilang pagmaneho aron malikay ang tanan sa peligro.

Matud pa ni Chiong nga accident prone area ang nahitaboan kaniadto pa, buot ni Chiong nga pangitaan sa Department of Public Works and Highways (DPWH) og paaging mabutangan og signage ang lugar nga kanunay'ng magpahinumdom sa mga motorista sa pag-amping.

Gihulagway ni Chiong nga ang nahitabo niadtong Sabado maoy labing unang dakong aksidente diha sa iyang dakbayan sulod na sa pipila ka tuig.

Sumala pa ni Chiong nga andam ang dakbayan paghatag og hinabang pinansyal sa mga biktima.

Samtang si Press Secretary Cerge Remonde kinsa usa ka Sugboanon mimando sa Department of Social Welfare Development (DSWD) nga tabangan ang mga biktima.

Sa laing bahin, si PO2 Miguel Castañares sa Naga Police Station sa pakighinabi sa Banat News nagkanayon nga naghuwat sila sa mga paryente sa biktima nga moreklamo kun ugaling gusto silang mokiha sa tag-iya sa EDC Line Mini Bus.

Ang operator hinuon sa maong minibus misaad nga insured ang matag sakyanan sa ilang kumpanya ug miabag sa gastuhan sa mga biktima.

Ang minibus nga gimaneho ni Allan Laoit gikan sa Carcar City padulong sa Sugbu misampak sa 10-wheeler truck nga gimaneho ni Hever Alibio nga gikan sa amihanan, si Alibio ug Laoit parehong nakalas.

Duna pay usa ka lalaking wala pa mailhi sa kapolisan nga gibana-banang nagpanuigon sa 30-40 anyos ug giutohang mi-hitch sa trak ni Alibio nga namatay usab.

Ang nahisgutang patay'ng lawas usa kini ka lalaki ug naa karon sa Saint Francis Funeral Homes sa Natalio Bacalso Avenue, dakbayan sa Sugbo. - Brenda Batuto (BANAT NEWS)