CEBU, Philippines - Nanawagan karon si Deputy Ombudsman for the Visayas Pelagio Apostol ngadto sa publiko nga magmaisugon sa pagpakigbatok sa korapsyon pinaagi sa pagsumbong ngadto sa buhatan sa Ombudsman kutob sa masakpan nilang opisyal sa gobyernong kiriwan o mangilkil o mangayo og suburno gikan sa publiko.
Matud pa ni Apostol nga kun walay magmaisugon nga mosumbong sa mga kahiwian sa mga opisyal sa kagamhanan, mosamot og kalapad ang problema sa nasud nga mao ang graft and corruption.
Giaghat usab ni Apostol ang katawhan nga tabangan ang buhatan sa Ombudsman sa paggukod ug pagtaral ngadto sa hukmanan sa mga opisyales sa gobyerno nga nagpahimulos sa ilang posesyon pinaagi sa pagpangawkaw sa kwarta sa katawhan.
Matud pa ni Apostol nga pinaagi sa pag-abag sa publiko sa tahas sa Ombudsman, hinayhinay nga kahatagan og kasulbaran ang korapsyon nga mihamok karon sa nasud ug mawagtang na ang nasud sa Pilipinas gikan sa listahan sa pinakakorakot nga nasud sa Asia ug sa tibuok kalibutan.
Samtang wala makatunga ang mga kadagkuan sa Ehem! Aha! sa gipahigayong Visayas Convention uban sa gilusad nga "Huli ka! Operation" nga may tema " Kadasig sa Kaligdong”.
Si Apostol mao ray gipadala sa maong komperensya isip representante sa buhatan sa Ombudsman. Sa maong convention, si Fr. Alberto Alejo, SJ, ang team leader sa maong grupo nagkanayon nga hayan maapil ang mga dagkong official sa nasudnong kagamhanan sa kontrobersiyal nga kaso bahin sa decorative lamppost nga giimbistigar karon sa Ombudsman. - Chester Abadilla (BANAT NEWS)