Gikan nag-internet gipusil -patay

CEBU, Philippines - Patay diha-diha ang usa ka batan-ong gikan pa sa internet café human giulo pagpusil sa usa ka gidudahang miyembro sa gang alas 10 sa gabii sa miaging adlaw sa barangay Tabunok dakbayan sa Talisay.

Si Clifford Abellana, 26, taga sitio Mahayag barangay San Isidro sa Talisay gipusil sa tulo ka suspetsadong sila Victoriano Abatayo, 21, Gerard Campo, 18 ug Junbert Reyes, 21, nga pulos lumulopyo sa sitio Sangi barangay Tabunok nga gidudahan sa kapolisan nga mga sakop sa gang.

Si PO3 Edwin Albarado misaysay sa Banat News nga gikan pa sa internet café ang biktima diha sa Tabunok ug paggawas niini sa pultahan kalit siyang gipusil sa usa sa mga suspek.

Sa gihimong hot pursuit operation sa kapolisan nasundan ang tulo nga nagbaklay palayo sa nahisgutang lugar, si Abatayo dihang girekisa nakuhaan og usa ka .38 kalibreng rebolber nga may tulo ka buhing bala.

Ang tulo positibong giila sa mga saksi nga maoy mipatay sa biktima hinungdan nga gibalhog ang tulo ug gikatakdang kasuhan karong adlawa.

Ang kapolisan karun nagpahigayon pa og dugang imbestigasyon kabahin sa motibo sa pagpamusil.  - Lesley Caminade (BANAT NEWS)