Magtiayong 'pusher' gidakop

CEBU, Philippines - Managtiayong gipasanginlang level 3 nga drug pushers nadakpan sa ilang panimalay atol sa pagpang-ronda kagahapon sa alas 5 sa buntag sa sitio Taboan barangay North Poblacion lungsod sa San Fernando. Giila ang duha mao sila si Jovino Rendal, 47, ug Maria Nelda Rendal, 41, nagpuyo sa nahisgutang lugar.

Ang managtiayong Rendal nakuhaan og tulo ka gagmay’ng pakete nga gituuhang shabu, drug paraphernalias, duha ka cellphone ug P120 cash.

Si SPO1 Jovani Barcenas sa San Fernando Police Station nga gikahinabi sa Banat News nagkanayon ang pagsikop gilusad sa Provincial Anti-Illegal Drugs Special Operation Task Group ug kapulisan sa San Fernando pinasikad sa search warrant nga giisyu ni Judge Silvestre Maamo sa Regional Trial Court (RTC-17).

Sulod sa usa ka bulang gipanid-an sa kapolisan ang magtiayon human makadawat og report nga namaligya kini og shabu. - Guam Logroño (BANAT NEWS)