Minibus vs. Trak 13 ang patay

CEBU, Philippines - Patay diha-diha ang 13 ka mga pasahero apil na ang duha ka driver sa nagsungag nga trak ug mini bus kagahapon sa alas-5 sa kaadlawon sa barangay Tuyan, dakbayan sa Naga.

Ang mga namatay giila sa kapulisan nga sila si Aladin Laoit, 34, taga barangay Villadolid dakbayan sa Carcar driver sa EDC Liner Mini Bus nga may plakang GWL225 ug ang kundoktor nga si Allan Omilgo.

Samtang patay usab ang driver sa truck van nga si Hever Alibio, 30, taga Pooc dakbayan sa Talisay driver sa Alvine Transports container van nga nagdala sa plakang GWH 298.

Ang mga pasaherong namatay sa minibus mao sila si Nestor Omilgo, 36, igsuon sa konduktor; mga pasaherong sila si Rodrigo Laña Jr., 39, assistant chief cook sa Sulpicio Lines; Warren Allesser, 29, taga Bolinawan Carcar; Virgilla Lobiano, taga Carcar; Nora Pacubas, 37, taga Balod, San Fernando ug anak niining si Charlene Pacubas, 10; Chonie Cavan, 30, taga barangay Guadalupe Cebu City ug Clire Jasma.

 Samtang atol ning pagsulat sa balita duna pay duha ka mga patay’ng lawas nga wala pa mailhi.

Padayon pa usab nga giatiman sa mga doctor sa South General Hospital ang mga nangaangol nga sila si Annabel Alforque; Maria Fe Rodella; Alexander Autida ug Jennifer Gregorio.

Matud pa ni PO3 Romeo Bolaño sa Naga City police dihang nahinabi sa Banat News ang minibus gikan pa sa Carcar ug gikatahong kusog kaayo ang padagan nga nakig-ginukdanay sa laing mini bus nga paingon sad sa siyudad sa Sugbo.

Ang 10-wheeler truck nga gikan sa siyudad sa Sugbo paingon sa habagatan nga bahin nga may kargang 20-footer van.

Sumala pa sa mga residente diha sa dapit nga pag-abot diha atubangang bahin sa South General Hospital mi-overtake ang maong mini bus sa gisundang minibus apan naatol nga gikasugat niini ang maong 10-wheeler truck.

Imbes nga mohatag og lugar ang nahaunang minibus gikatahong nagpaugat kini nga di maunhan hinungdan nga nagkasungag gyud ang EDC minibus ug ang trak.

Tungod sa kakusog sa pagbangga, nabaliwliw ang minibus ug naatubang og balik sa habagatan ug mipilit sa simod sa trak diha na sa pikas lane.

Gisubay na karon sa kapolisan kun si kinsa ang maong minibus nga gikalumba sa nadisgrasyang minibus aron maimbestigar usab ang drayber niini kabahin sa hitabo.

Ang mga residente ug sumasakay paingon sa habagatan mipadayag nga kaskasero gyud ang kadaghanan sa mga drayber sa mga minibus ilabi na panahon sa kagabhion ug sa kaadlawon.

Tungod sa kakusog sa pagbangga hapit katunga sa minibus ang napiyapi nabali na ang dulong niini ug napasok ilawom sa trak ug nalagpot gikan sa kasko ang makina niini ug nangalagpot ang mga ligid.

Naabtan na lang sa mga residente ug emergency personnel sa South General Hospital ang mga pasaherong nagkadugo ug nagpasad sa dalan samtang duna pay uban nga nangalugpitan sa napiyaping puthaw sa duha ka sakyanan.

Usa ka residente ang mitug-an nga nakakita pa og batang naghilak nga nanawag og “mama” uban sa mga napiyaping puthaw ug mga patay’ng lawas.

Ang mga sakop sa Emergency Rescue 761 pinanguluhan ni Kagawad Narciso Tablate, kanhi kapitan sa Inayagan, Naga nga miresponde nakaugkat og walo ka mga tawo, ang uban kanila patay na.

Ang tag-iya sa minibus nga si Eladio Colajo nga taga dakbayan sa Naga, nga nahinabi sa DySS mibutyag nga usa ka maayong driver si Laoit, ug gani duha na kini ka tuig kaniya isip driver.

Si Colajo nag-operate og siyam ka minibuses sulod sa onse na ka tuig apan kagahapon lang nakasugat og disgrasya.

Ang mga patay’ng lawas sa mga biktima gi-claim na hinuon sa ilang mga pamilya kagahapon human usab gi-asikaso ang mga balayranan niini pinaagi sa pag-abag sa kagamhanan sa dakbayan sa Naga nga daling niatiman sa mga kabanay sa mga namatay samtang niabag usab ang kagamhanan sa Probinsya sa Sugbu. – BANAT NEWS