Senior Citizen badgetan sa barangay

CEBU, Philippines - Hugot nga gipahimangno ni konsehal Emiliano Rosal, chairman sa committee on budget and appropriation sa konseho sa dakbayan sa Mandaue ngadto sa mga opisyal sa barangay sa paglakip sa ilang tinuig nga gahin sa 2009, sa gahin nga alang sa mga senior citizen (SC) ug Gender Development.

Matud pa ni Rosal nga kun mapakyas ang kapitan sa barangay sa paglakip sa gahin alang sa SC sa ilang tinuig nga budget, iuli kini sa dakbayan ngadto sa maong barangay ug dili dawaton ang unsa mang budget nga ilang isumiter alang sa barangay.

Gipasabot ni konsehal Rosal nga mahinungdanon kaayo ang paglakip diha sa ilang tinuig nga gahin, ang gahin alang sa SC kay kabahin kini sa mga programa sa kagamhanan nga gihan-ay alang sa mga tiguwang.

Base sa balaod, 5 porsiyento sa katibuk-ang gahin sa barangay maoy alang sa SC.

Apan gitataw ni Rosal nga kadtong mga gagmay’ng barangay nga mag-uylahot sa paghatag og 5 porsiyento sa ilang gahin para sa SC, gitugot sa konseho nga himoon nila kini sa data-data nga paagi, hangtod nga matuman gayud ang 5 porsiyento nga gahin alang sa mga tiguwang. - Romeo T. Limpangog (BANAT NEWS)