Barangay Assembly himuon karong adlawa

CEBU, Philippines - Gipahinumduman sa Department of Interior and Local Government (DILG) ang kabarangayan sa dakbayan sa Sugbu sa pagduyog sa ipahigayong Nationwide Simultaneous Barangay Assembly karong adlawa.

Ang pagpahigayon sa maong kalihukan gimando ubos sa Local Government Code of 1991 ingon man sa Proclamation Number 342 nga nagdeklarar sa katapusang Sabado sa Marso ug sa ikatulong Sabado sa buwan sa Oktobre matag tuig isip Barangay Assembly Day.

Subay niini giawhag ni Cebu City DILG Director Patricio Gabuya ang kabarangayan sa dakbayan nga moduyog sa maong kalihukan.

Gisugyot sa direktor nga tukion atol sa assembly ang accomplishment ug financial report gawas sa pagtuki sa problema sa barangay partikular ang problema sa ginadiling drugas ug sa solid waste management ug uban pang mga hisgutanan.

Samtang gipaabot usab sa DILG director nga mopresentar og report ang matag barangay labot sa nagkadaiyang mga komitiba, partikular na ang Barangay Development Council, Barangay Peace and Order Committee, Barangay Disaster and Coordinating Council ug uban pa.

Sa pikas bahin, giawhag ni Gabuya ang mga molupyo sa kabarangayan nga magpakabana ug motambong sa barangay assembly.

 Kini aron mapaminaw ang mga kalihukan ug mga plano sa ilang mga opisyales ug mahatagan usab og pagtagad ang ilang ipadangat nga reklamo.

Kadtong mga barangay nga mapakyas pagpahigayon og assembly karong adlawa hatagan pa hinuon og kahigayunan nga makapahigayon niini.

Apan matud pa ni Gabuya nga kadtong magdumili gihapon pagtuman sa ilang katungdanan bisan pa sa gihatag nga panahon, mag-atubang unya og problema.  - Elly Bolonos (BANAT NEWS)