Kolektor sa lending gitulis

CEBU, Philippines - Gitulis sa duha ka armadong lalaki ang usa ka lending collector gikan nga nangoleksyon sa mga kliyente sa bukirang bahin sa barangay Cunalom lungsod sa Argao niadtong Miyerkules sa alas 2:00 sa hapon.

Ang biktima nga nagbaklay nalang nga midangop sa kapulisan human usab apila og dala ang iyang motorsiklo mao si Teotimo Pacenio Bayun-on Jr, 28, lumad nga taga lungsod sa Sta. Fe isla sa Bantayan ug collector sa CMDFI lending Argao branch.

Ang mga butang nga nasakiyo sa biktima mao ang bag niini nga gisudlan sa P28,000.00 nga koleksiyon, personal niyang kwarta sa pitaka niini nga P1,800.00 ug ang iyang cellphone nga mokantidad og P4,800.00.

Matud ni PO1 Bernie Lao sa Argao police dihang nahinabi sa Banat News gikan nga nangolekta sa mga kliyinte sa maong lugar si Bayun-on ug paingon na unta kining mo-report og balik sa opisina.

Apan pag-abot sa mingaw nga lugar gibabagan kini sa usa ka suspek nga armado og wala matinong kalibre sa armas ug gitionan dayun gimanduan sa paghunong.

Ang suspek gikatahong milipot sa luyo ug mibira sa iyang bag, pitaka ug cellphone dayong pakanaog kaniya sa motorsiklong Honda XRM ug maoy gigamit isip getaway vehicle.

Sa gihimong follow-up operation sa kapulisan na-recover ang motorsiklo diha sa sitio Cabongbongan barangay Cansuje ingon man ang bag ug mga papeles apan wala nay sulod nga kwarta. - Darrel Carumba (BANAT NEWS)