Secret marshals ipakatap sa CCPO

CEBU, Philippines - Mga ‘secret marshal’ sa kapolisan subling ipakatap gumikan sa pagsiaw karon og balik sa mga tulisan nga namiktima na usab og mga pasahero ug drayber.

Kini maoy gipahibalo ni Sr. Insp. Michael Anthony Bastes, ang hepe sa Theft and Robbery Section sa Cebu City Police subay usab ning pagkusog sa tulis sa mga jeep pasaheruan ingon man mga taxi.

Matud pa ni Bastes si Sr. Supt. Patrocinio Comendador maoy mipagawas sa maong kamandoan aron mamenusan kundili man masumpo ang mga tulisan nga nagsigeg pamiktima.

Ning bag-uhay lang usa ka taxi driver ang gitulis ug gipatay dinhi sa dakbayan.

Si Bastes nagkanayon nga hasta ang mga sakop sa Barangay Intelligence Network ingon man uban pang crime volunteers ang ilang patabangon sa pag-roving ilabi na panahon sa kagabhion.

Matud pa niini, nagpabiling aktibo ang Task Force Motorsiklo ug ila gihangyo ang ubang mga crime volunteers sa pag-abag kanila gikan sa alas 8 sa gabii nga pag-roving hangtud na sa alas12 sa kagabhion.

Samtang gibutyag ni Bastes nga ang area diin didto gipatay ang duha ka mga taxi drivers nga si Victor Aballe, ug Gregorio Presores gibutangan na og mga BIN ug barangay tanod nga mag-roving panahon sa kagabhion.

Gibutyag usab ni Bastes nga gawas sa anggulong tulis ang motibo sa pagpatay kang Presores, nagtuo sad silang posibleng dunay laing motibo sa maong krimen.

Giawhag niini ang mga taxi driver nga mag-amping sa ilang pagpamasahero panahon sa kagabhion nga dili magpataka’g pasakay’g mga pasahero ilabi na niadtong mga kadudahan og mga dagway aron malikay sa disgrasya. -  BANAT NEWS