CEBU, Philippines - Giabswelto ni Judge Rosabella Tormis sa Municipal Trial Court in Cities kagahapon ang polis nga gipasanginlang nakapusil-patay sa iyang kaubang polis samtang naggokud sa usa ka suspetsadong tulisan unom ka tuig na ang nakalabay.
Si SPO4 Juanito Pajantoy kinsa usa na karon ka Inspector ug nadestino sa Cebu City Police Office maoy gitumbok nga nakapusil-patay sa iyang ka-partner sa Mabolo Police Station nga si PO3 Michael Sarcol niadtong Hulyo 15, 2003.
Gikasuhan sa Cebu City Police Office Homicide Section si Pajantoy og kasong reckless imprudence resulting to homicide tungod niini ug laing kaso usab tungod sa kamatayon sa suspek nga ilang gigukod nga si Omar Patino.
Sa lima ka pahinang desisyon ni Tormis, ang huwes nakakita og buslot sa kaso gumikan kay wala makapresentar og lig-ong ebidensya ang prosekusyon pagmatuod nga ang bala ba gyud ni Pajantoy maoy nakaigo kang Sarcol nga maoy nakaingon sa kamatayon sa ulahi.
Matud pa ni Tormis nga bugtong lang na-establisar mao nga si Pajantoy ug Sarcol miresponde sa alarma ug migukod sa suspetsadong tulisan nga si Omar Patino diha sa General Maxilom Avenue human kini manulis.
Ug base usab sa mga testimoniya sa mga saksi na-establisar nga si Pajantoy, Sarcol ug Patino ang parehong mga armado ug nagsinukliay og bala niadtong tungura.
Atol sa maong ginukuray si Sarcol naigo og bala sa luyo maong si Pajantoy nga diha sa likod maoy gidudahang nakaunay og igo sa iyang kauban.
Apan si Pajantoy ang mihimakak sa mga pasangil ug mipasangil kang Patino nga maoy nakapusil kang Sarcol atol sa ginukdanay.
Matud ni Pajantoy nga sa pagkakita niya sa iyang kauban nga nahagba diha sa yuta mibalos siya og pusil kang Patino kinsa naigo usab ug namatay.
Si Tormis mihatag og konsiderasyon sa nahauna nang desisyon sa laing korte nga maoy naggunit sa kaso batok kang Pajantoy may labot usab sa kamatayon ni Patino diin ang maong polis giabswelto usab.
Si Pajantoy sa interview sa Balitang Bisdak kagahapon nagkanayon nga karong nalimpyohan na ang iyang pangalan buot niyang pahingusgan pa ang pakig-away sa mga kriminal. - Gikan sa The Freeman (BANAT NEWS)