Katoliko di mosuporta ni Padre Panlilio

CEBU, Philippines - Walay mapaabot nga suporta gikan sa Simbahang Katoliko dinhi sa Sugbo ang kandidatura ni Gobernador Ed Panlilio sa lalawigan sa Pampanga kinsa nagtinguha nga mokandidato pagka Presidente sa nasud unya sa piniliay sa 2010.

Hinoon gi-awhag sa tigpamaba sa Archdiocese sa Sugbo, Monsenyor Achilles Dakay si Panlilio kinsa usa ka pari nga Katoliko nga mas maayo pang mo-resign nalang siya sa pagka pari aron seryosohon niini ang pag-intra sa politika.

Giklaro ni Dakay nga kalapasan gyud sa balaod sa simbahan subay sa cannon law ang paghupot og posisyon sa gobiyerno ug pagsalmot sa politika sa usa ka pari o obispo.

Gani mao kini hinungdan nga suspendido hangtud karon si Panlilio sa iyang pagka pari human mapiling gobernador sa Pampanga.

Alang kang Dakay lisud saligan ang usa ka lider nga modumala sa labing taas nga posisyon sa gobiyerno kun kini mismo wala makasunod sa mga lagda sa simbahan sa pag-silbi niining pari.

Gibutyag ni Dakay nga bisan didto sa Pampanga daghan sa mga pari ug obispo nga wala gyud makauyon ning pag-intra sa politika ni Panlilio.

Matud ni Dakay nga posibling masuportahan sa simbahan si Panlilio sa kandidatura niini, kana kun hingpit kining mobiya sa pagka-pari.

Karong bag-o milutaw ang Panlilio ug Isabela governor Grace Padaca nga tandem alang sa pagka kandidato pagkapresidente ug bise presidente sa nasud sa 2010 election. - Darrel A. Carumba (BANAT NEWS)