CEBU, Philippines - Nabulabog ang pipila ka mga kawani sa Cebu City Hall nga sayong mitunga sa ilang trabaho kagahapong adlawa dihang sila gisugat sa kayo uban sa kusog nga aso.
Si Juanita Baring, staff ni konsehal Jun Pe, maoy unang nakakita sa kayo nga misiga sulod sa garbage drum sa third floor sa Legislative Building mga alas 7:35 sa buntag.
Ang maong kawani na maoy nanawag og bombero dayong kuha sa ilang office fire extinguisher ug gihatag ngadto sa laing empleyado nga maoy migamit niini.
Wala na hinoon makapasirit og tubig ang mga bombero tungod kay nadali ra ang pagkapawong sa kayo ug wala na kini nila hiabti.
Apan ang nahisgutang fire alarm nakamugna og kalisang sa ubang mga kawani nga diha na sa ilang tagsa-tagsa ka mga buhatan sa maong building.
Gituohan sa pipila ka mga empleyado sa City Hall nga dunay upos sa sigarilyo nga gilabay sa maong sudlanan sa basura nga maoy hinungdan sa pagdilaab sa kayo.
Subay niini, ang chairman sa Cebu City Disaster Coordinating Council (CCDCC) nga si konsehal Gerardo Carillo mimando na og imbistigasyon sa maong insidente.
Gitahasan sa konsehal sa pagpahigayon og pakisusi mao ang building maintenance sa City Hall uban kang City Fire Marshall Superintendent Ismael Codilla.
Sa kasamtangan niingon si Carillo nga hugot na nilang ipatuman ang ordinansa sa dakbayan nga nagdili pagpanabako sa publikong mga dapit sa siyudad.
Basi sa record sa investigation section sa Cebu City Fire Department, ang nahisgutang fire alarm mao nay ika-6 nga alarma nga nadawat sa kabomberohan sa dakbayan niining buwana.
Kini samtang gisaulog ang buwan sa Marso nga Fire Prevention Month nga nagdala sa tema nga “Fire Safety: A Challenge, Concern and Priority for Everyone. - BANAT NEWS)