Ombuds gihagit Ebdane i-apil sa pakisusi

CEBU, Philippines - Gihagit sa usa ka abogada ang Ombudsman Visayas sa pag-apil sa imbestigasyon sa kontrobersiyal nga overpricing sa lamppost kang Department of Public Works and Highways Secretary Hermogenes Ebdane.

Si Atty. Gloria Dalawampu, abogada ni kanhi Mayor Thadeo Ouano sa Mandaue, nagkanayon nga kun buot sa Ombudsman Visayas nga mahatagan og hingpit nga kasulbaran ang kaso, angayan i-apil niini sa imbestigasyon ang mga tag-as nga opisyal nga maoy direktang nalambigit sa pagpamalit sa mga lamppost nga gipamutang sa mga kasilinganang siyudad sa Metro Cebu atol sa miaging Asean summit.

“Nganong mananggal man na ang ilang imbestigasyon? Nitan-aw ra man sila gikan sa hawak paingon sa ubos. Nganong wala man nila tan-awa gikan sa hawak paingon sa ulo?” si Dalawampu nagkanayon, ug mipasabot nga ang subasta ug pagpamalit sa mga lamppost didto nahitabo sa buhatan sa DPWH sa kauluhan.

Dugang pa niya nga ang pagpamutang og lamppost usa ka national project nga walay kalambigitan ang mga lokal nga kagamhanan.

Gipasabot niya nga ang program of works and estimates (POWE) nga gipirmahan sa enhinyero sa dakbayan sa Mandaue dili usa ka kontrata busa dili kini mahimong ebidensiya batok kang Ouano.

“Ang POWE dili man na kontrata. Ang ilang kaso ‘entering into contracts that is prejudicial to the government’ man kaha. Wala man mopirma og kontrata si Mayor Ouano,” si Dalawampu nagkanayon.

“It has become a sham investigation,” ang abogada miingon. - John Rey Saavedra (BANAT NEWS)