Wanted sa Leyte tiklo sa Mandaue

CEBU, Philippines - Usa ka “most wanted” sa kapolisan sa Tabango, Leyte nadakpan sa kapolisan sa dakbayan sa Mandaue sa miaging hapon.

Ang nadakpan mao si Gene Boy Sumayang, 19, nga taga sitio Tahao, sa barangay Campokpok, dakbayan sa Tabango, Leyte ug temporaryong nagpuyo sa dakbayan sa Mandaue.

Ang warrant of arrest nga giluwatan ni Judge Celso Mantua sa Regional Trial Court (RTC) 8 Branch 17 maoy gibasehan nila ni Superintendent Jason Capoy sa pagdakop sa suspetsado.

Nasayran nga si Sumayang nag-atubang og kasong rape ug homicide sa korte sa Tabango, Leyte.

Apan misibat kini didto ug nanarbaho diha sa reclamation area sa dakbayan sa Mandaue diin siya dakpa sa kapolisan.

Gibalhug kini karon sa Presinto 2 sa Subangdaku Police Station ug gikatakdang dad-on kini ngadto sa Tabango aron atubangon niya ang kiha batok kaniya. - BANAT NEWS