Talisay mosalmot sa Earth Hour

CEBU, Philippines - Ang dakbayan sa Talisay andam nga mosalmot sa International Earth Hour (IEH) karong Marso 28, 2009, usa ka tulumanon nga ipatuman sa tibuok kalibotan kalabot sa isyu bahin sa global warming.

Si Mayor Socrates Fernandez miluwat sa Memorandum No. 2009-0044 nga gipetsahan og Marso 12 nga nag-awhag sa tanang opisyal sa siyudad, department heads, mga regular ug job orders nga mga kawani sa city hall nga mosalmot sa pagpamawong sa suga karong Marso 28, 2009 gikan sa alas 8:30 hangtud sa 9:30 agig suporta sa IEH.

Gipasabot ni Fernandez sa iyang memo nga ang IEH usa ka kalihokan sa tibuok kalibotan nga salmotan sa mokapin sa 1,000 ka mga dakbayan ug mga kalungsoran, ug usa ka bilyon ka tawo, gikan sa patigayon, gobyerno ug komunidad nga gilaumang mosalmot niini.

Matud ni Fernandez nga ang maong kalihukan usa ka pag-awhag ngadto sa matag usa ka tawo, gobyerno, patigayon nga angayang magpakabana o mahimong responsable aron sa pagsiguro nga ang planetang Earth makasustiner pa hangtod sa mga umaabot nga mga siglo .

Si Fernandez midugang nga ang IEH usa ka mensahe sa aksiyon ug paglaom. - BANAT NEWS