Castro gitubag og kiha sa BID-7 officials

CEBU, Philippines - Gitubag og pasaka og kaso sa Bureau of Immigration and Deportation ang gipasakang kaso sa kontrobersyal nga si Cebu City Assistant City Prosecutor ug karon OIC Board of Special Inquiry Chief, Fiscal Mary Ann Castro kagahapon sa buntag diha sa buhatan sa Visayas Ombudsman.

Kasong Extortion, Grave Threats ug Harassment sa mga kadagkuan sa BID 7 batok kang Castro, usa ka adlaw human mosang-at ang naulahi og kasong Libelo batok ni BID—7 Regional Director Casimiro Madarang III ug Fernando San Ramon,ang presidente sa Cebu Immigration Officers and Employees Association Incorporated.

Dugang kasong gipasaka ni Castro batok kang Madarang mao ang two-counts of falsification of documents diha sa Cebu City Prosecutors Office.

Ang pagsang-at og kaso sa mga opisyales sa BID-7 dalang hangyo sa Department of Justice nga tangtangon na sa BID-7 si Castro tungod sa giingong kanunayn'g pagpanghudlat niini sa mga empleyado kun di matumanan sa gusto niini.

Ang BID-7 officials girepresentahan ni Atty. Gloria Lastimosa-Dalawampu mipasangil nga gipangayoan sila ni Castro og P20 mil nga allowance isip overtime pay nga matud pang Madarang walay labot si Castro niini gumikan kay dili siya immigration officer.

 Gitumbok usab sa affidavits nila ni Madarang ug San Ramon nga dihang nagdumili si San Ramon pagkihol sa gipangayo ni Castro gihulga siya niining ikiha, gikatahong makaduha na kini buhata ni Castro kaniya.

Si Castro dihang gihinabi sa Banat News mihimakak niining tanan ug nagkanayon nga igo ra siyang nangayo og dokumento sa kahugpungan ni San Ramon, financial statement ug ang articles and by laws niini nga dugay gihatag sa maong opisyal hinungdan sa iyang kasuko.

Si Castro nasagmuyo sa gihulagway niyang “tinalawang” pamaagi ni Madarang niadtong miaging Biyernes nga nagsalikway na kaniya isip sakop sa BID-7 samtang tua pa siya sa Ozamis City.

Si Madarang mitug-an sa interview sa DyRF kagahapon sa buntag nga lakip sa ilang gipadad-an og sulat reklamo mao si Presidente Gloria Macapagal Arroyo pinaagi sa Sugbuanong Press Secretary Cerge Remonde aron maundang na ang giingong padayon nga pagpangharas ni Castro. - BANAT NEWS