CEBU, Philippines - Ang kanhi presidente sa Integrated Bar of the Philippines kon IBP Cebu provincial chapter naapil usab sa nabiktima kontrobersiyal nga pre-need firm nga gipanag-iya sa Legacy Group of Companies nga gipanag-iya ni Celso delos Angeles.
Si Atty. Manuel Monzon nagkanayon nga wala na usab siya makapahimulos sa iyang education plan sa Legacy tungod kay nanirado na man kini dungan sa pagpanira sa mga bangko niini.
Matud pa ni Monzon duna pay laing sakop sa IBP nga apil sa nabiktima sa maong scam.
Si Monzon mipahibalo nga andam siya paghatag og libreng tabang sa mga depositors sa mga bangko sa Legacy kun sila mopasaka og kaso .
Si Monzon maoy usa sa mga abogadong nakigtagbo kang Senador Mar Roxas kinsa nibisita sa dakbayan sa Sugbu aron pakigtagbuan ang mga biktimang mga depositor sa bangko sa legacy pagpursiger sa pagpasaka og kaso batok kang delos Angeles.
Tinguha sa senador nga makuha sa korte ang tanang mga assets ni delos Angeles dinhi sa Sugbu aron maoy gamiton sa pagbayad ngadto sa mga depositors. - BANAT NEWS