CEBU, Philippines – Ania sa Sugbo karong buntag si Senador Manuel “Mar” Roxas nga maoy pinasidunggan dinapit ug mamumulong sa usa ka forum sa mga planholders ug investors sa Legacy Consolidated Plans Inc. ug uban pang mga planholders gikan sa mga naniradong kompaniya sa mga pension ug educational plans.
Si Roxas nga chairman sa Senate committee on Trade and Commerce maoy nangulo ug nangusog aron masilotan ang tag-iya sa Legacy nga si Celso delos Angeles tungod sa giingong pagpangilad ngadto sa mga investors sa ilang gideposito nga hinagoan nga kuwarta.
Matud ni Philip Picchio, presidente sa Parents Enabling Parents (PEP) Coalition nga ang Cebu maoy ikaduha sa Metro Manila nga dunay kinadaghanang planholders nga nabiktima sa “double-your-money” scheme ni delos Angeles.
“I am confused on why Cebu is so silent and to think Cebu has the biggest number of victims. They should come out in the open and do something instead of just sitting down on their chair and wait something to happen,” tug-an pang Picchio sa dihang nahinabi sa The Freeman kagahapon.
Si Picchio nangimbitar nga motambong karong buntag sa maong kalihukan dili lang kadtong mga planholders ug investors sa Legacy lakip na niini ang ubang planholders sa College Assurance Plans, Pryce Plans Inc. ug Pacific Plans Inc.
Ang kalihukan ipahigayon diha sa Cebu Normal University sa alas 7:30 karong buntag ug mahuman sa alas 10:30 sa buntag gihapon.
Midugang si Picchio nga daghang mga adunahan ug inila nga Sugboanon ang nabiktima ni delos Angeles apan nagpanagana ug maulaw kining magpakita ngadto sa publiko.
Matud ni Picchio nga usa ka adunahang Sugboanon mitug-an kaniya nga mi-invest siya og P49 milyones ug duna pay laing Sugboanon nga nagpahibalo kaniya nga mi-invest usab kini og P35 milyones ngadto sa Legacy. –BANAT NEWS