CEBU, Philippines - Aron may katrabahoan ang mga Pilipino dinhi sa nasud ug dili na mangandoy pag-adto sa gawas, gi-umol ni Presidente Gloria Macapagal Arroyo ang ‘economic stimulous program’ kansang pundo maggikan sa 1.5 porsiyentong madaginot sa matag ahensya sa gobiyerno.
Matud pa ni Press Secretary Cerge Remonde nga ang mahipos sa kagamhanan matag tuig gikan ning maong sistema sa pagdaginot, mokabat sa P7 bilyones kapin.
Ang maong kantidad maoy gamiton alang sa nagkalainlaing proyekto sa nasudnong kagamhanan nga makapabukas og mga trabaho nga kasudlan sa mga walay trabaho ilabi na niadtong bag-ong mograduwar sa kolehiyo.
Gibutyag kini ni Remonde atol sa iyang pagpamulong atubangan sa 537 ka mga estudyanteng migraduwar sa Cebu State College of Science and Technology (CSCST) Argao Campus niadtong Sabado sa hapon.
Matud pa ni Remonde nga ang tinguha sa kagamhanan mao nga himoon nalang sayon alang sa tanang mga Pilipino ang panarbaho dinhi sa kaugalingon natong nasud.
Kini tungod kay niining panahon sa gitawag nga “global economic crisis”, hasta ang mga nasud sa gawas nag-ilaid usab sa kalisud busa ang mga Pilipino nga nanarbaho didto may posibilidad usab nga matangtang sa ilang trabaho.
Kining maong sistema maoy kabahin sa “stimulous economic package” sa kagamhanan diin sama sa Estados Unidos sa America (USA) kini gitumong aron katabangang mobangon ang mga nalukapang negosyo pinaagi sa pagpahuwam kanila sa gobiyerno og puhonan.
Sa ingon niini kun makabangon na sila, ang maong mga kompaniya makahatag na usab og trabaho niadtong mga walay trabaho, matud pa ni Remonde. (BANAT NEWS)