Kapolisan palikayon sa politika

CEBU, Philippines - Ang pangulo sa Police Regional Office (PRO-7) Chief Supt. Federico Terte miawhag sa iyang mga sakop nga modistansya sa mga isyung may kalambigitan sa pulitika.

Kini maoy panawagan ni Terte ngadto sa iyang mga sakop sa Cebu City Police Office (CCPO) subay usab sa panagbangi karon nila Cebu City Mayor Tomas Osmeña ug Bise Mayor Mike Rama.

“Sa mga kapolisan natin, just do your job,” sumala pang Terte ug midugang nga gamiton ang ilang kaugalingong pangisip sa pagbuhat unsay nahasubay sa ilang kamandoan.

Hinuon giklaro niini nga sila sa kapulisan niadto pa gyud wala mag-apil-apil sa isyu sa pulitika ug kini usab maoy gipadayag ni Sr. Supt. Patrocinio Comendador ang hepe sa kapulisan sa dakbayan sa Sugbu.

Hinuon giklaro ni Terte nga kun ugaling adunay pormal nga reklamo labot sa giingong pag-interbiner ni Rama sa operation sa kapulisan diha sa Sambag II andam sad silang mo-imbestigar niini. (Guam Logroño)    (BANAT NEWS)