CEBU, Philippines - Imbestigahon sa Commission on Human Rights (CHR)-7ang kaso sa duha ka napalgang patay sa Sta. Catalina Negros Oriental tungod sa reklamo sa mga kabanay nga mga sundalo maoy ulahing nakit-ang mipik-ap kanila. Si Virginia Ragin inahan sa 26-anyos nga mag-uumang si Ronel Ragin nga na-missing patay nang napalgan personal nga miadto kagahapon sa buhatan sa CHR-7 aron mangayo’g tabang uban ni Alejandrina Quirante asawa sa mag-uumang si Julito Quirante kinsa napalgan sad nga patay na.
Naglaraw nga mopasaka og kasong criminal ang mga kabanay sa duha batok sa sa mga sakop sa 79th Infantry Battalion nga maoy gidudahang responsable sa pagpatay sa duha.
Ang tigpamaba sa Karapatan nga si Vimarie Arcilla nga maoy mitabang nilang Ragin ug Quirante miingon nga nahadlok ang maong mga pamilya nga mogara pagpa-violate sa tawhanong katungod.
Matud pang Arcilla ang mga biktima parehong gidakop ug giimbestigar sa mga sundalo tungod sa pagdudang mga sakop sila sa New Peoples Army (NPA).
Mipasangil ang Karapatan nga sa wala pa signita ang duha kanunay’ng makit-an sa ilang panimalay ang mga sundalo ug dunay higayon nga nanulod ang mga sundalo ug mi-ransack sa ilang mga butang.
Nangangkon ang Karapatan nga dunay batang gisikop ug giimbestigar usab sa mga sundalo apan nakaeskapo, ang maong bata gikatahong gipangutana kung sakop ba kini sa NPA.
Ang patayng lawas nilang Ragin ug Quirante gikawot niadtong Marso 9 didto sa sitio Hunob sa barangay Nabinlod Sta. Catalina, si Alekandrina Quirante nangayo’g tabang sa mga polis niadtong Enero 31 human wala na makauli ang bana sukad mobisita sa kabanay aron mamaylo og pagkaon.
Samtang si Ragin na-missing niadtong Pebrero 1, ug napalgan usab uban ni Quirante nga pulois gipanggapos ug gisap-ongan ang mga baba og panapton.
Si Quirante sakop sa Nagkahiusang Ma-uuma sa Sta. Catalina ug si Ragin miyembro usab sa Talalak United Farmers Association apan ang duha di managkaila.
Si Primo Cadampog supervising investigator sa CHR niingon ang reklamo ila nang gi-imbestigar ang reklamo ug kun mapamatud-an may kalambigitan ang military ilaha kining irekomendar nga pasakaan og kaso. (Rey Pasaporte) (BANAT NEWS)