Polis Giposposan Namusil

CEBU, Philippines - Napusilan sa usa ka polis nga nagtubag og shooting alarm ang uyoan sa suspek namuspos og kahoy sa ulo sa polis samtang nag-imbestigar sa mga saksi didto sa bukirang bahin sa barangay Tubod, lungsod sa Sibonga niadtong Biyernes sa gabii.

Ang uyoan sa suspek nga nakaangkon og samad pinusilan sa iyang tuong bahin sa paa mao si Anicito Quinto, hingkod ang panuigon, minyo, walay klarong trabaho ug molupyo sa nahisgutang lugar.

Samtang ang polis nga nalipong ug hapit makuyapi human maposposi og kahoy sa tangkogo mao si PO2 Roque Senarillos III, nadestino sa Sibonga Police Station.

Matud ni PO3 Niño Ibo sa Sibonga Police Station sa dihang nahinabi sa Banat News nga mga alas 8:30 sa gabii niadtong Biyernes nakadawat sila og report may labot sa nahitabong pagpamusil sa maong lugar hinungdan nga dali dayon silang miresponde sa barangay Tubod.

Sa pag-abot nila sa lugar didto ilang nahibaw-an ang biktima sa pagpamusil nga mao si Ceperino Fernandez, hingkod ang panuigon, minyo ug molupyo sa Sitio Tipolo, barangay Tubod samtang ang suspek mao si Eugene Quinto alyas Angel, hingkod ang panuigon ug nagpuyo sa maong lugar.

Matud ni PO3 Ibo subay sa inisyal nilang imbestigasyon samtang paingon na unta nga mopauli si Fernandez sakay sa motorsiklo niini kalit lang miabot si Quinto ug sa walay igong hinungdan gipusil si Fernandez ug naigo sa iyang tuo nga bat-ang dayong sibat pahilayo sa suspek ug ang biktima gidala sa tambalanan.

Apan nianang pagka alas 10 sa gabii sa dihang miabot na ang mga polis nga nagpahigayon dayun kini og imbestigasyon sekretong gikahinabi ni PO2 Senarillos ang kagawad sa barangay nga si Gomer Recaborda didto sa luyo nga bahin sa pinuy-anan niini ug maoy mitug-an niya sa mga suspek.

Apan ang uyoan sa suspek nga si Anicito nga nagpahipi lang sa ngitngit niadtong higayona naminaw sa ilang gi-estoryahan ug sa dihang nadunggan niini nga mitug-an ang kagawad sa iyang pag-umangkon nga maoy suspek sa pagpamusil gilipot niini si PO2 Senarillos ug dayong pusposan sa gibitbit niining kahoy sa tangkogo ug nasarasay ang maong polis. Isunod usab unta pagpuspos og kahoy ang kagawad hinungdan nga gipusil kini ni PO2 Senarillos ug naigo sa tuong paa.

Si Anicito gidala sa tambalanan ug pagkahuman gibalhog sa detention cell sa kapolisan samtang magpaabot sa tukmang kaso batuk niya samtang si PO2 Senarillos gidis-armahan sa iyang mga kaubang polis samtang magpadayon pa ang imbestigasyon.

Ang kapolisan padayon pang nagpangita sa suspek nga si Eugene Quinto nga dunay warrant of arrest sa kasong robbery tungod sa pagtulis niini sa amahan ni Bise Mayor Nestor Ponce niadtong milabay’ng mga bulan.

Matud ni PO3 Ibo nasuko ang suspek ngadto sa biktima nga si Fernandez og iya kining gipusil human nagtuo kini nga maoy naghatag ug inpormasyon sa kapolisan gumikan kay nagsilbi man kining sakop sa Barangay Intelligence Network (BIN) sa ilang lugar. - BANAT NEWS