CEBU, Philippines - Gitanggong sa kapolisan sa dakbayan sa Mandaue ang usa ka tawong “wanted” human kini hidakpi sa kasong pagpanglugos.
Ang nadakpan mao si Jimmy dela Cruz Carbonel, 56, minyo, nga taga Negros Oriental ug temporaryong nagpuyo sa dakbayan sa Bogo.
Nadakpan kini nila ni PO2 Rosendo Cabreram, PO1 Godofredo Olingay, ug PO1 Jojen Jacaban sa kapolisan sa Presinto I sa Centro Police Station sa dakbayan sa Mandaue pinasikad sa warrant of arrest nga giluwatan ni Judge Antonio Marigomen sa Regional Trial Court (RTC) 7 Branch 61 nga nagbase sa dakbayan sa Bogo.
Si PO3 Edmundo Belacora nga nahinabi sa Banat News miingon nga gipasakaan og kaso ang suspetsado sa usa ka minor de edad nga babaye nga matud pa gilugos sa nahauna niadtong Hulyo 16, 2007.
Dugang pa ni PO3 Belacora nga ang suspetsado midali pagsibat human ikapasaka ang kasong pagpanglugos batok kaniya. Apan matud pa ni PO3 Belacora nga may nakasigpat sa suspetsado sa pag-agi niini sa merkado publiko unya gisumbong dayon ngadto sa kapolisan nga maoy hinungdan sa pagkasikop niini. - Romeo T. Limpangog (BANAT NEWS)