CEBU, Philippines - Gikumpirmar ni Supt. Jonathan Abella ang pamahayag ni Mayor Tomas Osmeña kabahin sa giingong pang-interbiner ni Vice Mayor Michael Rama atol sa ilang anti-illegal gambling operation niadtong tuig 2008 sa Nobiyembre.
Matud pa ni Abella, chief sa City Intelligence Branch (CIB) sa mga sakop sa media nakadawat sila og report kabahin sa mga gambling machines diha sa sitio Kawayan sa barangay Sambag II maong kini gisusi sa iyang mga sakop.
Apan nasayran nalang ni Abella nga na-trapped ang mga polis nga sila si SPO1 Ricardo Albotra, PO3 Cerilo Luage, PO3 Roel Tabañag, PO1 Dennis Mosqueda ug usa ka bagitong polis nga nag- Field Training Program sulod sa balay diin makit-i ang tulo ka video karera lakip na ang usa ka notadong drug pusher nga naatlang nagsugal ug giilang si Benjamin Morales.
Gikatahong pag-abot na nila ni Abella ug sa dayon na nilang pull-out sa dapit nakadungog sila og buto sa armas ug usa ka wala mailhing tawo ang ilang nakit-ang midagan padulong sa panimalay sa usa ka ginganlan og “Tata Negro.”
Apan sa ilang paggukod sa maong tawo sa maong balay duna sila'y nakit-ang bata sa sulod maong ilang gihangyo ang maong tawo nga mogawas sa panimalay, diha nalang nila masayri pipila ka minutos ang nakalabay nga nakaikyas na diay kini.
Dugang pa ni Abella, tunga-tunga sa ilang operasyon nga adunay lalaking nanawag sa cellphone ug nag-pailang amigo ni “Tata Negro” ug gustong makig-estorya kang Abella.
Diha nalang masayri ni Abella pagtubag sa telepono nga ang iyang kaestorya mao si Vice Mayor Michael Rama diay.
Gikatahong gipangutana kaniya kung aduna ba sila'y search warrant aron sudlon ang balay ni “Tata Negro” maong miesplikar si Abella nga “hot pursuit operation” ang ilang gihimo maong wala sila'y nadalang search warrant.
Si Abella nagkanayon gumikan kay wala sila'y kamandoan gikan sa korte gikatahong gimandoan siya ni Rama nga dili pahilabtan ang panimalay ug midugang sa pag-ingon “klaruha na diha.”
Miangkon si Abella nga nag-alanganin siya kun unsay iyang buhaton ug nakadesider nga tumanon nalang kini.
“Vice Mayor baya siya, mosunod gyud ta,” matud pang Abella. – BANAT NEWS