CEBU, Philippines - Gibasehan karun sa kapolisan ang barangay blotter kabahin sa reklamo sa tulo ka dalagitang mipasangil nga gimaltrato sa ilang amo nga anak sa 68-anyos nga negosyanteng gipusil-patay sa miaging adlaw sulod sa ilang panimalay sa barangay Camputhaw.
Nasayran nga tulo ka mga dalagitang sila si Jenelyn Real, 18, Miraluna Masqueda ug ang 17-anyos nga kaliwat nga pulos taga Sinadangan, Zamboanga Del Norte mireklamo batok ni Victor Yu, anak sa gipusil-patay nga si Ana Cue Yu.
Ang anak ni Yu gireklamo sa mga katabang niadtong Septiyembre 2008 gumikan sa giingong pagmaltrato kanila.
Ang tulo misumbong sa barangay nga pakan-on sila niini og daw lawog sa iro, gidid-an silang makagawas sa panimalay ug aron masigurong di sila makagawas trangkahan gyud ang ilang gate.
Dugang reklamo mao ang makalibog nga sistema sa ilang agalon nga kanunay’ng momando kanilang padalion paghuman sa ilang trabaho apan kun matapos nila kini og sayo masuko usab kini ug kwestiyunon nganong dali nila kining natapos.
Tungod niining mga pagmaltrato kanila nagpakitabang sila sa taga barangay ug ang naulahi wala maglangay ug gidali sila sa pagluwas gikan sa mga kamot sa ilang amo.
Si Cebu City Sr. Supt. Patrocino Comendador, director sa Cebu City Police Office nagkanayon nga ilang susihon karon ang posibilidad nga may koneksyon ang pagpusil-patay kang Ana Cue Yu sa maong pasangil nga pagpamaltrato sa maong mga kababayen-an ug ang naulahi ra maoy napanimaslan.
Apan wala usab nila isalikway ang posibilidad nga may laing anggulong nagpaluyo sa pagpatay gawas lang sa anggulong tulis ang tuyo sa mamumuno tungod kay wala may nakuhang kabtangan sa pamilyang Yu.
Samtang naglisod usab pagkuha og dugang impormasyon ang kapolisan sa lugar bisan pa og adunay nakakita sa hitabo tungod kay walay mga silingang mihatag og pamahayag kanila. - Lesley Caminade (BANAT NEWS)