Signature campaign vs. kap gisugdan

CEBU, Philippines - Pormal nang gisugdan sa mga kagawad sa barangay Canjulao sa dakbayan sa Lapulapu ang signature campaign batok sa ilang barangay kapitan nga si Kapitan Rufo Bering aron ma-recall sa iyang katungdanan ang naulahi.

Matud pa ni Charles Baylosis ang tigpamaba sa barangay nagkinahanglan lang sila og 1,200 kapin nga pirma gikan sa 5,100 ka mga botante aron ikasukip sa ilang petisyon nga isumiter ngadto sa Commission on Elections pagpa-recall kang Bering.

Si Bering sa iyang bahin mipadayag nga masayon ra sa iyang mga kaatbang ang pagkuha sa maong gidaghanon sa pirma tungod kay daghan sa iyang mga konstituwente ang supporters ni Mayor Arturo Radaza.

Matud pa ni Bering magpaabot nalang siya unya sa resulta sa ilang pagpa-recall kaniya, apan nakasiguro kining mapakyas lang ang iyang mga kaatbang sa ilang mga tinguha.

Samtang si Lapulapu City ABC President ug Pajo barangay Capt. Leo Mercado mipadayag nga ang ilang asosasyon walay mahimo ug ikatabang karon kang Bering tungod kay kini kontrobersiya sa iyang barangay.

Matud pa ni Mercado adunay tulobagon si Bering sa iyang mga opisyales ug residente ug angayan niya kini atubangon ug sulbaron.

Ang kontrobersya mitumaw human pasanginli si Bering sa lima ka mga kagawad sa dili maayong pagdumala sa ilang barangay ug kwestyonable usab ang mga transaksiyon nga gipanghimo niini sa ngalan sa ilang barangay.

Usa na niini ang alegasyong walay klarong kwentada ug husay sa mga nakolekta ug nagasto sa kahugpungan nga gimugna niini nga "Abag Silingan," kining maong akusasyon kusganong gihimakak sa kapitan. - Bong Soriano (BANAT NEWS)