15 porsiyento ray matinahurong driver

CEBU, Philippines - Gihulagway sa Land Transportation Office-7 nga duna lay 10 ngadto sa 15 porsiyento sa mga drayber ug pampublikong sakyanan dinhi sa Central Visayas ilabina sa Sugbu ang mga tarung ug matinahuron sa lagda sa trapiko.

Si Assistant Regional Director sa LTO-7 nga si Ed Catarungan nagkanayon nga walay angay’ng ikabalaka ang mga drayber sa multahan kun sila matinahuron sa lagda sa trapiko.

Matud ni Catarungan tumong ug tuyo niini aron ma-disiplina ug mapitol ang mga badlungong drayber lukop nasud hinungdan nga gipadak-an ang multa pinaagi sa gipatumang Department Order No. 2008-39 sugod niadtong Marso 2 niining bulana.

Sa maong kamandoan wala kini magpasabot nga mga jeepney drivers ra maoy maapektahan niini kundili ang tanang motoristang makalapas sa balaud pribado man o pampubliko.

Apan ang Nagkahiusang Drayber sa Sugbu (Nadsu) pinangulohan ni Ruben Rama, Secretary General hugtanong misupak niining implementasyon sa maong order tungod kay alang kanila bug-at kaayo ang multa nga mokabat na kapin usa ka libo ang bayranan kung sila madakpan.

Si Eduardo Geolin, Nadsu council member mitataw nga dili gyud nila dapigan ang ilang mga drayber nga magpabadlong sa kadalanan.

Si Geolin nagkanayon nga buot usab nilang mapitol ang ilang mga miyembrong nagpabadlong apan ang wala mauyoni mao ang kadako sa bayranan sa makalapas sa lagda sa trapiko.

Kahinumduman niadtong Lunes ang Nadsu ug PISTON nipahigayon og rally sa buhatan ni LTO-7 director Raul Aguilos aron iduso ang ilang position paper nga miresulta hinuon sa transport strike niadtong higayona.

Samtang gidayeg usab ni Geolin ang pamahayag ni Rep. Pablo John Garcia nga nagsaway usab sa maong kamandoan ug misaway sa mayor sa dakbayan sa Sugbu nga kusganong mipadayag sa kasagmuyo kanilang mga drayber ug buot nga matangtangan sila og prangkisa.

Hangtud ning pagsulat sa balita wala pay tubag nga nadawat ang mga transport groups kabahin sa ilang petisyon batok sa maong kamandoan samtang wala pa usab makadawat og summon ang operators gikan sa LTFRB kabahin sa pagpatawag kanila aron paghatag og katin-awan sa nahitabong transport strike. – BANAT NEWS